ပဲမျိုးစုံဈေးနှုန်းများကျဆင်းရေးကြိုးပမ်းမှုတစ်စိတ်တစ်ပိုင်းအနေဖြင့် အိန္ဒိယနိုင်ငံသည် စားတော်ပဲ (Yellow Pea) အား အကောက်ခွန်လွတ် တင်သွင်းခွင့်ကို ၂၀၂၆ ခုနှစ် မတ် ၃၁ ရက် အထိ သက်တမ်းတိုးမြှင့်ပေးခဲ့ကြောင်း သိရှိရသည်။
အိန္ဒိယနိုင်ငံသည် စားတော်ပဲကို ကနေဒါနှင့် ရုရှားနိုင်ငံတို့မှ အဓိကတင်သွင်းပြီး ကမ္ဘာ့ အကြီးဆုံး တင်သွင်းသူဖြစ်သည်။
တရုတ်စားသုံးသူများသည် အရည်အသွေးမြင့် ရေထွက်ကုန်ပစ္စည်းများကို စားသုံးမှုမြင့်တက်လာခြင်းကြောင့် တရုတ်နိုင်ငံသည် နော်ဝေပင်လယ်စာများအတွက် အလျင်အမြန် ကြီးထွားလာနေသည့် ဈေးကွက်ဖြစ်လာပြီး ဝယ်လိုအားမှာလည်း ကြီးထွားနေဆဲဖြစ်ကြောင်း နော်ဝေပင်လယ်စာကောင်စီက ပြောကြားခဲ့ကြောင်း သိရှိရသည်။
ဘင်္ဂလားဒေ့ရှ်နိုင်ငံမှ တရုတ်နိုင်ငံသို့ ပထမဆုံး တင်ပို့သည့် သရက်သီး (၃)တန်သည် တရုတ် နိုင်ငံအလယ်ပိုင်း၊ ဟူနန်ပြည်နယ်၊ ချန်ရှားမြို့သို့ ရောက်ရှိလာခဲ့ကြောင်း သိရှိရသည်။ ရောက်ရှိလာချိန်တွင် Changsha Huanghua အပြည်ပြည်ဆိုင်ရာလေဆိပ်ရှိ အကောက်ခွန်အရာရှိများသည် တင်ပို့သည့်တံဆိပ်များနှင့် ပိုးမွှားကင်းရှင်းကြောင်းလက်မှတ်များကို ချက်ချင်းစစ်ဆေးကာ ထုပ်ပိုးမှုနှင့် သစ်သီးများကို ဖွင့်ဖောက်စစ်ဆေးမှုများ ပြုလုပ်ခဲ့ပြီးနောက် အကောက် ခွန်ရှင်းလင်းမှုကို ခွင့်ပြုပေးခဲ့ကြောင်း သိရှိရပါသည်။
ပြည်ပဝယ်လိုအား နည်းနေသဖြင့် မြန်မာ့မတ်ပဲဈေးမှာ တည်ငြိမ်နေပါသည်။ ဧရာဝတီတိုင်းဒေသကြီးမှ ကုန်သည်များသည် မေလမှစတင်ကာ မတ်ပဲဈေးမှာ ပုံမှန်ပေါက်ဈေးရှိကြောင်းသိရသည်။ အိန္ဒိယရှိ ပဲစက်ရုံများ၏ ဝယ်လိုအားနည်းပါးခြင်းကြောင့် မြန်မာနိုင်ငံတွင် မတ်ပဲဈေး ကျဆင်းခဲ့ပါသည်။ မဒ္ဒယာပရာဒေ့ရှ်ပြည်နယ်မှ မတ်ပဲသည် ဈေးကွက်သို့ ပေါပေါများများ ရောက်ရှိနေပြီဟု အိန္ဒိယ သတင်းများတွင် ဖော်ပြသည်။
တရုတ်နိုင်ငံသည် မြန်မာနိုင်ငံမှ နူးညံ့ပြီး အစိုဓာတ်ရှိသော ကွမ်းသီးပေါင်းများကို ပိုမိုဝယ်ယူနေကြ၍ ရောင်းအားမြင့်နေကြောင်း ကုန်သည်များကပြောကြသည်။
ဧရာဝတီတိုင်းဒေသကြီးတွင် နူးညံ့ပြီး အစိုဓာတ်ရှိသော ကွမ်းသီးပေါင်းများ အရောင်းအဝယ် ဖြစ်လျက်ရှိပါသည်။ ကွမ်းသီးများကို ရေနွေးငွေ့ဖြင့် ပေါင်းခံပြီး တရုတ်နိုင်ငံသို့ တင်ပို့လျက် ရှိပါသည်။
ရာသီမှိုတစ်မျိုးဖြစ်သည့် earthstar မှိုသည် ယခုအခါ ဈေးကွက်တွင် ရရှိနိုင်ပြီး လူကြိုက်များသော အစားအစာတစ်ခုဖြစ်ပြီး ရာသီအစပိုင်းကာလ ဈေးနှုန်းမြင့်တက်လာကြောင်း ရောင်းချသူများထံမှ သိရှိရပါသည်။ ဈေးနှုန်းမှာ ၁ ပိဿာလျှင် ကျပ် ၁၀၀,၀၀၀ ကျော်ရှိသည်။
