မန္တလေးငလျင်ကြီးလှုပ်ခတ်မှုကြောင့် ထိခိုက်ခဲ့သည့် ဆင်သေရေလှောင်တမံ အခိုင်အမာပြုပြင်နေမှု ကြည့်ရှုစစ်ဆေး

နေပြည်တော် ၊ မတ် ၉

ငလျင်ကြီးလှုပ်ခတ်မှုကြောင့် ထိခိုက်ခဲ့သည့် ပြည်တော်စုနယ်မြေ နေပြည်တော်၊ တပ်ကုန်းမြို့နယ်၊ မယ်ဇလီကျင်းကျေးရွာအနီးရှိ ဆင်သေရေလှောင်တမံ အခိုင်အမာ ပြုပြင်နေမှုအား မတ် ၇ ရက်နေ့ က စိုက်ပျိုးရေး၊ မွေးမြူရေးနှင့် ဆည်မြောင်း ဝန်ကြီးဌာန ဒုတိယဝန်ကြီး ဦးဗိုလ်ဗိုလ်ကျော်သည် တာဝန်ရှိသူများ နှင့်အတူ ကြည့်ရှု စစ်ဆေးသည်။

ဦးစွာ တာဝန်ရှိသူများက ဆင်သေရေလှောင်တမံ ပြုပြင်ခြင်းလုပ်ငန်းတွင် ပြန်လည်ပြုပြင်မည့် ဒီဇိုင်းပုံစံများ၊ လအလိုက်ဆောင်ရွက် ရန် လျာထားမှု၊ လက်ရှိ လုပ်ငန်းဆောင်ရွက်နေမှု အခြေအနေတို့အား ရှင်းလင်းတင်ပြရာ ဒုတိယဝန်ကြီးက ရေလှောင်တမံပြန်လည် ပြုပြင်ရာတွင် ပိုမိုခိုင်ခံ့ပြီး နောင်ရေရှည်လုံခြုံစိတ်ချနိုင်ရေးအတွက်  သတ်မှတ်စံချိန်စံညွှန်းများအတိုင်း အရည်အသွေးပြည့်မီစွာ အချိန်မီပြီးစီးရေး အထူးအလေးထား ဆောင် ရွက်ကြရန်၊ ရေလှောင်တမံနှင့် ရေပိုလွှဲတို့၏ ကြံ့ခိုင်ရေးကို Dam Monitoring စောင်ကြည့်တိုင်းတာ စစ်ဆေးမှုများ အမြဲမပြတ်ဆောင် ရွက်ကြရန်၊ နွေစပါး အပါအဝင် အခြားနွေသီးနှံလျာထား စိုက်ဧကများအတိုင်း လုံလောက်စွာ စိုက်ပျိုးရေ ပေးဝေနိုင်ရေး စီမံဆောင်ရွက်ကြရန်နှင့် အခြားနည်းပညာပိုင်း ဆိုင်ရာ လိုအပ်သည်များ ဆွေးနွေးမှာကြားပြီး လုပ်ငန်းခွင်အတွင်း ဆောင်ရွက်လျက်ရှိသော တမံ Rock Toe ရေစစ်ကျောက်ရိုးစီခြင်း၊ မြေကြီး ဖို့ခြင်း၊ တမံနှင့် ဆက်စပ်လုပ်ငန်းများဆောင်ရွက်နေမှုများအား ကြည့် ရှုစစ်ဆေးသည်။

ဆင်သေရေလှောင်တမံသည် ဒေသခံတောင်သူများ ရာသီအလိုက် နွေစပါး၊ မိုးစပါး နှင့် အခြားသီးနှံများ အချိန်မီ အောင်မြင်ဖြစ်ထွန်းစွာ စိုက်ပျိုးနိုင်ရေးအတွက် နှစ်စဉ် စိုက်ပျိုးရေ လုံလောက်စွာဖြန့်ဝေပေးလျက်ရှိသော ရေလှောင်တမံတစ်ခုဖြစ်ကြောင်း သိရသည်။ ဆင်သေရေလှောင်တမံ အနေဖြင့် ယခု(၂၀၂၅-၂၀၂၆)နွေသီးနှံရာသီတွင် နွေစပါး နှင့် နွေအခြားသီးနှံ လျာထားဧကပေါင်း ၁၁၅၈၀ ရှိသည့်အနက် ယနေ့အထိ နွေစပါး ၅၃၇၉ ဧကအား စိုက်ပျိုးရေပေးဝေထားရှိပြီး ကျန်ဧကများအားလည်း စိုက်ပျိုးရေ ဆက်လက် ပေးဝေလျက်ရှိကြောင်း သိရသည်။

ဆက်လက်၍ ဒုတိယဝန်ကြီးသည် တပ်ကုန်းမြို့နယ်၊ သရက်ကွင်းကျေးရွာအနီး၌ အသစ်တည်ဆောက်မည့် ဆင်သေရေလွှဲဆည်နေရာသို့ရောက်ရှိစဉ် ရေလွှဲဆည်အသစ် တည်ဆောက်နိုင်ရေးအတွက် ကြိုတင်ပြင်ဆင်နေမှုများ၊ ရေလွှဲဆည်အူကြောင်း (Alignment) ရွေးချယ်ထားရှိမှု၊ သတ်မှတ်ဒီဇိုင်းပုံစံအရ မြေပြင်နေအထားနှင့် ကိုက်ညီမှုရှိ မရှိအခြေအနေအား ကြည့်ရှုစစ်ဆေးပြီး လုပ်ငန်းဆိုင်ရာ လိုအပ်သည်များ ဆွေးနွေး မှာကြားသည်။

ထို့နောက် ဆင်သေရေသောက်စနစ် လက်ဝဲလက်တံ(၁) မြောင်းအဖျားပိုင်းအထိ နွေစပါးနှင့် နွေအခြားသီးနှံ စိုက်ပျိုးရေပေးဝေမှု အခြေအနေတို့အား ကြည့်ရှုစစ်ဆေးပြီး ဒေသခံတောင်သူများနှင့် တွေ့ဆုံ ၍ စိုက်ပျိုးရေ လေလွင့်ဆုံးရှုံးမှု မရှိစေရေးနှင့် စနစ်တကျအကျိုးရှိစွာ သုံးစွဲကြရန် ဆွေးနွေးမှာကြားသည်။

ထိုမှတစ်ဆင့် ဒုတိယဝန်ကြီးသည် ရေဆင်းဆည်ရေသောက်စနစ် ဧရိယာအတွင်း လက်ယာလက်တံ(၂)မြောင်းမကြီးမှ စိုက်ပျိုးရေပေးဝေနေမှု အခြေအနေကို ကြည့်ရှု စစ်ဆေးပြီး ဒေသခံတောင်သူများနှင့် တွေ့ဆုံ၍  ဆည်‌ရေပေးဝေရာတွင် အခက်အခဲ အဟန့်အတားမရှိ ရေစီးရေလာကောင်းမွန်စေရေးအတွက် မိမိတို့လယ်ယာမြေအနီးရှိ လယ်ကြားမြောင်းများပြန်လည်တူးဖော်ခြင်းနှင့် အခြားလိုအပ်သည်များ ဌာနနှင့်အတူ ပူးပေါင်း ဆောင်ရွက်ကြရန်၊ စိုက်ပျိုးရေကို စနစ်တကျ အကျိုးရှိစွာ သုံးစွဲကြရန်၊ မြောင်းဖျားပိုင်းရှိ လယ်ကွက်များအထိ စိုက်ပျိုးရေမျှတစွာ ရရှိစေရေးနှင့် စိုက်ပျိုးရေ ရယူရာတွင် အခက်အခဲရှိပါက သက်ဆိုင်ရာတာဝန်ရှိသူများနှင့် ဆက်သွယ်ညှိနှိုင်း ဆောင်ရွက်ကြရန် ဆွေးနွေးမှာကြား သည်။    

ရေဆင်းရေလှောင်တမံ အနေဖြင့် (၂၀၂၅-၂၀၂၆) ခုနှစ်အတွင်း နွေစပါး ၆၂၄၆ ဧက၊ နွေအခြားသီးနှံ ၁၁၈၀ ဧက စုစုပေါင်း ၇၄၂၆ ဧက စိုက်ပျိုးရေပေးဝေရန် လျာထား ဆောင်ရွက်လျက်ရှိကြောင်း သတင်းရရှိသည်။

MOALI