စိုက်ပျိုးမွေးမြူရေးပညာနှင့် နိုင်ငံတကာစိုက်ပျိုးမွေးမြူရေးတက္ကသိုလ်များ(အပိုင်း-၄၄)

စိုက်ပျိုးမွေးမြူရေးပညာနှင့် နိုင်ငံတကာစိုက်ပျိုးမွေးမြူရေးတက္ကသိုလ်များ(အပိုင်း-၄၄)

 Agricultural High Schools in NSW, Australia

(ယခင်အပတ်မှအဆက်)

 Agricultural High Schools in NSW, Australia

ဩစတေးလျနိုင်ငံ၊ နယူးဆောက်ဝေးပြည်နယ်တွင် စိုက်ပျိုးမွေးမြူရေး အထက်တန်းကျောင်းများ (Agricultural High Schools) ဆိုသည်မှာ ပြည်သူအများပိုင် အထက်တန်းကျောင်း (Public School) အမျိုးအစားတစ်ခုဖြစ်ပြီး စိုက်ပျိုးရေး၊ သိပ္ပံနှင့်ကျေးလက်ဒေသလုပ်ငန်းများကိုစိတ်ဝင်စားပြီး ပညာရေးအရ ထူးချွန်သော ကျောင်းသားများအတွက် ရည်ရွယ်ထားပါသည်။

ဤအထက်တန်းကျောင်းများမှာ ၇ တန်းနှစ် (Year 7) မှ ၁၀ တန်းနှစ် (Year 10) အထိ စိုက်ပျိုး၊ မွေးမြူရေး (Agriculture) ဘာသာကို မဖြစ်မနေ သင်ယူရပါသည်။ ပုံမှန်သင် ဘာသာရပ် (Academic subjects) များ နှင့်အတူ လက်တွေ့စိုက်ပျိုးရေး၊ စိုက်မွေး လက်တွေ့ကွင်းသိပ္ပံ (Farm science) များကို သင်ကြားရပါသည်။ ကျေးလက်ဒေသ ဝေးလံသောနေရာမှ ကျောင်းသားများအတွက် ကျောင်းအိပ်၊ ကျောင်းစား၊ စားသောက်၊ နေထိုင်နိုင်သော ကျောင်းဆောင် (Boarding facility) ပံ့ပိုးမှု ပါရှိပါသည်။

ဤနယူးဆောက်ဝေးပြည်နယ်တွင် စိုက်ပျိုးမွေးမြူရေး အထက်တန်းကျောင်းများ (Fully Selective Agricultural High Schools in NSW) စုစုပေါင်း ၄ ကျောင်း ရှိပါသည်။ (စိုက်ပျိုးမွေးမြူရေးကျောင်းများစွာ ဖွင့်လှစ်ခြင်းမရှိဘဲ နည်းနည်းနှင့် အရည်အသွေးမီမီ Quality Agricultural Education စိုက်ပျိုးရေးပညာ ရရှိအောင် ဆောင်ရွက်နေသည်ကို အတုခိုးရပါမည်)။

  1. ဖာရာအထိမ်းအမှတ် စိုက်ပျိုးမွေးမြူရေး အထက်တန်းကျောင်း (Farrer Memorial Agricultural High School)

  2. ဟာစတုန်း စိုက်ပျိုးမွေးမြူရေး အထက်တန်းကျောင်း (Hurlstone Agricultural High School)

  3. ဂျိန်းရူးစ် စိုက်ပျိုးမွေးမြူရေး အထက်တန်းကျောင်း (James Ruse Agricultural High School)

  4. ရမ်ကို စိုက်ပျိုးမွေးမြူရေး အထက်တန်းကျောင်း (Yanco Agricultural High School) တို့ရှိပါသည်။

စိုက်ပျိုးမွေးမြူရေးအထက်တန်းကျောင်းများ(Agricultural High Schools) ဖွင့်လှစ်ရခြင်း ရည်ရွယ်ချက်များ

  1. စိုက်ပျိုးမွေးမြူရေးကို စိတ်ဝင်စားသော ကျောင်းစားရိတ်လိုအပ်သော ကျောင်းသား/သူများ (Gifted Students) များကို ပံ့ပိုးခြင်း။

  2. အလုပ်အကိုင်လမ်းကြောင်း (Career Pathways) များသို့ ပြင်ဆင်ပေးခြင်း။ ဥပမာ - စိုက်ပျိုးစီးပွားရေး (Agribusiness)၊ မွေးမြူရေးသိပ္ပံ (Animal Science)၊ အပင်သိပ္ပံ (Plant Science)၊ ပတ်ဝန်းကျင်သိပ္ပံ (Environmental Science)၊ စိုက်ပျိုးရေး အင်ဂျင်နီယာ (Agricultural Engineering) ပညာများဖြင့် ကျေးလက်လူထုအဖွဲ့အစည်း (Rural Communities) အတွက် အနာဂတ် စိုက်ပျိုးမွေးမြူရေး ပညာရှင်များ ပြုစုပျိုး ထောင်ပေးပါသည်။

ဝင်ခွင့်ရရှိရန် လိုအပ်ချက်များ (Entry Requirements) ပုံမှန် လမ်းကြောင်းများမှာ —

အခြေခံပညာ အလယ်တန်း ဥပမာ  ၅ တန်း (Year 5) သို့မဟုတ် ၆-တန်း (Year 6)အစောပိုင်းတွင် လျှောက်ထားနိုင်ပါသည်။ လျှောက်ထားသူများပြားပါက လူနှင့်ကျောင်းနေရာ ရွေးချယ်သော စာမေးပွဲ (Selective High School Placement Test) ဖြေဆိုရပါမည်။ စာမေးပွဲရမှတ် (Academic Result + Test Result) အပေါ် မူတည်၍ ရွေးချယ် ရေးဘုတ်အဖွဲ့က စိစစ်ရွေးချယ်ပေးပါသည်။

စိုက်ပျိုး၊ မွေးမြူရေးအထက်တန်းကျောင်းများအတွက် သင့်တော်သော ကျောင်းသား/သူများ

ပညာတတ် ထူးချွန်သူများ (High Academic Ability)၊ သိပ္ပံနှင့်စိုက်ပျိုးမွေးမြူရေး (Science + Agriculture) စိတ်ဝင်စားသူ လူငယ်များ၊ လက်တွေ့စိုက်ပျိုးမွေးမြူရေးလုပ်ငန်းများ (Practical Farm Work) လုပ်ကိုင်နိုင်သူများ၊ ကျေးလက်နေဇာတိ (Rural Background) ဖြစ်သူများ (ကျောင်းအိပ်၊ ကျောင်းစား - Boarding Schools အတွက် အထူးသင့်တော်ပါသည်) အတွက်မူ ထူးချွန်မှုကို အခြေခံပြီး ရွေးချယ်ပါသည်။

ဤအထက်တန်းကျောင်းများသည် အဆောင်မှ တက်ရောက်ရသည်မဟုတ်ဘဲ၊ မိမိအိမ်မှလည်း တက်ရောက်နိုင်ပါသည်။ ကျောင်း ဆောင်နေခွင့်ရဖို့အတွက် ရွေးချယ်ရေးကော်မတီက ကျောင်းသား၊ ကျောင်းသူ၏ မိဘနေရပ်၊ စီးပွားရေး အခြေအနေတို့ကို ကြည့်ပြီး ဆုံးဖြတ်ကြပါသည်။

ငွေကြေးအကူအညီလိုအပ်ပါက (Financial Supports) လည်း ပညာတော်သင်ဆု အမျိုးမျိုး (Scholarships) ဖြင့် ကျေးလက်ဒေသ ကျောင်းသူ၊ ကျောင်းသားများအတွက် ဦးစားပေးထောက်ပံ့ပေးနေပါသည်။ 

ဤကျောင်းများမှ ၁၂-တန်း (Year 12) အပြီးတွင် ဩစတေးလျတက္ကသိုလ်များ ဝင်ခွင့် (ATAR_Australian Tertiary Admission Rank) ရရှိပါသည်။ တက္ကသိုလ် (University) ဝင်ရန် အရေးကြီးဆုံးအချက်မှာ ATAR ဖြစ်ပါသည်။

အထက်တန်းကျောင်းပြီးပါက တက္ကသိုလ် စိုက်ပျိုးမွေးမြူရေးဘွဲ့ (University Agriculture Degree) သို့ ဝင်ရောက်ပြီး ဆက်လက်ပညာသင်ခြင်းပြုလုပ်ကြပါသည်။

နယူးဆောက်ဝေး စိုက်ပျိုးမွေးမြူရေးအထက်တန်းကျောင်းများ (NSW Agricultural High Schools)မှ ကျောင်းသား၊ ကျောင်းသူများသည် အောက်ပါ တက္ကသိုလ်များသို့ ဝင်ရောက်၍ စိုက်ပျိုးမွေးမြူရေးပညာများ ဆက်လက်သင်ယူကြပါသည် —

  1. ဆစ်ဒနီတက္ကသိုလ် (The University of Sydney) စိုက်ပျိုးမွေးမြူရေးဘွဲ့ (Bachelor of Agricultural Science)/Bachelor of Science (Agriculture major)၊ အပင်သိပ္ပံဘွဲ့ (Plant Science)၊ မွေးမြူရေးနှင့်ကုသရေးဇီဝသိပ္ပံဘွဲ့ (Animal & Veterinary Bioscience) သို့တက်ရောက်သင်ယူနိုင်ပါသည်၊

  2. နယူးအင်ဂလန်တက္ကသိုလ် (University of New England) ကျေးလက်သိပ္ပံဘွဲ့ (Bachelor of Rural Science)၊ စိုက်ပျိုးစီးပွားရေး (Agribusiness)၊ မွေးမြူရေးသိပ္ပံ (Livestock & Animal Science) သို့တက်ရောက်သင်ယူနိုင်ပါသည်၊

  3. ချားလ်စတူးဝတ်တက္ကသိုလ် (Charles Sturt University) စိုက်ပျိုးမွေးမြူရေးသိပ္ပံဘွဲ့ (Agriculture)၊ စိုက်ပျိုးစီးပွားရေး (Agribusiness)၊ ဥယျာဉ်ခြံသီးနှံဘွဲ့ (Horticulture) သို့တက်ရောက်သင်ယူနိုင်ပါသည်။

 
စာရေးသူ၏အတွေး

လေ့လာချက်အရ ဩစတေးလျတစ်နိုင်ငံလုံး စိုက်ပျိုးမွေးမြူရေး အထက်တန်း ကျောင်း(၅) ကျောင်းမှ (၁၆) ကျောင်းသာရှိကြောင်း တွေ့ရှိရပါသည်။ (စာရင်းဇယား အတိအကျ မရရှိပါ)၊ သို့သော် ဩစတေးလျတစ်နိုင်ငံလုံး စိုက်ပျိုးမွေးမြူရေး အထက်တန်း ကျောင်းနည်းနည်းသာထားပြီး နိုင်ငံတော်အစိုးရမှ ပံ့ပိုးမှုများစွာရှိကာ စိုက်ပျိုးမွေးမြူရေး ဆိုင်ရာထူးချွန်၊ဝါသနာပါသောလူငယ်များစွာကိုအလယ်တန်း၊အထက်တန်း ဘဝကတည်းက အရည်အသွေးမြင့်  (High Quality)၊ အဆင့်မြင့်တက္ကသိုလ်များ အထိပေါက်မြောက် ထူးချွန်ကာ (Outstanding Agricultural students up to Tertiary Education Institutions) ဩစတေးလျနိုင်ငံကို ပြန်လည် အလုပ်အကျွေးပြုပေးနိုင်မည့် စိုက်ပျိုးမွေးမြူရေးပညာရှင်များ သီးသန့် ပျိုးထောင်ပေးသည့် အစီအစဉ် ဖြစ်ပါသည်။ 
(အားကျအတုယူရပါသည်)

 ဒေါက်တာမျိုးကြွယ်

(ဆက်လက်ဖော်ပြပါမည်)