စံချိန်စံညွှန်းပြည့်မီသည့် အရည်အသွေးကောင်းပို့ကုန်သီးနှံများ တိုးတက်စိုက်ပျိုးထုတ်လုပ်ရေး ညှိနှိုင်းဆွေးနွေး

ရန်ကုန်၊ မေ ၁၉

စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန ပြည်ထောင်စုဝန်ကြီး ဦးမင်းနောင်သည် မေ ၁၉ ရက်နေ့ နေ့လယ်ပိုင်းတွင် ဒုတိယဝန်ကြီးများ၊ တိုင်းဒေသကြီး နှင့် ပြည်နယ်အစိုးရအဖွဲ့ဝင် စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးများ၊ စိုက်ပျိုးရေး ဦးစီးမှူးများအား ရန်ကုန်တိုင်းဒေသကြီး၊ ဗဟန်းမြို့နယ်၊ မြေပဒေသာဥယျာဉ် စိုက်ပျိုးရေးပြတိုက်၌ တွေ့ဆုံ၍ စိုက်ပျိုးမွေးမြူရေးကဏ္ဍကို မြှင့်တင်ဆောင်ရွက်ပြီး ဒေသအလိုက် ဝမ်းစာဖူလုံမှုအပြင် ပို့ကုန်ကဏ္ဍတိုးတက်ရေး အလေးထားဆောင်ရွက်ရန် ၊  အရေးကြီးသီးနှံ ၁၄ မျိုး၏ စိုက်ဧက ၊ အထွက်နှုန်းနှင့် စိုက်ပျိုးထုတ်လုပ်မှုဆိုင်ရာ စာရင်းဇယား ကိန်းဂဏန်းများ မှန်ကန်ရေး ၊ သီးထပ်တိုးချဲ့ စိုက်ပျိုးရေးဆောင်ရွက်ရာ၌ တစ်နှစ်(၁)သီး၊ (၂)သီး၊ (၃)သီးစိုက်ပျိုးလျက်ရှိသည့် ဒေသများကို စိစစ်ပြီး အနည်းဆုံး(၂)သီးမှ (၃)သီးအထိ စိုက်ပျိုးနိုင်စေရန် လိုအပ်ချက်နှင့် ဆောင်ရွက်နိုင်မည့်နည်းလမ်းများ ရှာဖွေ ဖော်ထုတ်၍ ဦးစားပေးအလိုက်ဆောင်ရွက်ရန်၊ စံချိန်စံညွှန်း ပြည့်မီသည့် အရည်အသွေး ကောင်း ပို့ကုန်သီးနှံများ စိုက်ပျိုး ထုတ်လုပ်နိုင်ရေးအတွက် မျိုး၊မြေ၊ရေ၊နည်းပညာများ အပြင် Export Qualityအတွက် လိုအပ်သည့် အဆောက်အဦး နှင့် သိုလှောင်ရုံများ စီမံဆောင်ရွက် နိုင်ရေး ၊ Rice Export Zone များအတွက် ချေးငွေများအား စိုက်ပျိုးစရိတ်အဖြစ် အမှန် တကယ် အကျိုးရှိစွာအသုံးချနိုင်ရေးကြပ်မတ်ဆောင်ရွက်ရန်၊ ဆီထွက်သီးနှံ ပဲပုတ်စိုက်ပျိုး သည့် ဒေသအလိုက် ပန်းတိုင်အထွက်ရရှိရေးအပြင် ဆီကြိတ် ထုတ်လုပ်ခြင်းနှင့် တိရစ္ဆာန် အစာကုန်ကြမ်းတိုးတက်ရရှိအောင် စီမံဆောင်ရွက်ရန်၊ စိန်တစ်လုံးသရက်အား ၁၂ ရာသီလုံး ဈေးကွက်တွင်ရှိစေရန် မိမိတို့ဝန်ကြီးဌာန က သုတေသနပြုဆောင်ရွက်လျက်ရှိပြီး ဒေသ အလိုက် ရေမြေရာသီဥတုနှင့်ကိုက်ညီသော သရက်စိုက်ပျိုးထုတ်လုပ်မှုကို အားပေးမြှင့်တင် ဆောင်ရွက်ရန်၊ ရော်ဘာ နှင့် ဆီအုန်း စိုက်ခင်းများတွင် အထွက်နှုန်းမကောင်းသော မျိုးညံ့များ အား အရည်အသွေးကောင်းသော ပင်ပျိုများ အစားထိုးစိုက်ပျိုးခြင်းကို နှစ်ရှည်ပင်များ ခုတ်လှဲခြင်း (SOP)စံပြုလုပ်ထုံးလုပ်နည်းနှင့်အညီ ဆောင်ရွက်နိုင်ရန်အတွက် လုပ်ငန်းရှင်များ တောင်သူ များအား အသိပညာပေး စည်းရုံး ဆောင်ရွက်ရန်၊ မြေနိမ့်ကော်ဖီတိုးချဲ့ စိုက်ပျိုး နိုင်ရေး နှင့် ကိုကိုးစိုက်ဧကတိုးတက်ရေး ၊ ဝဥ  ပီလောပီနံ နှင့် သီဟိုသီးနှံများ တိုးချဲ့ စိုက်ပျိုးရေး ၊ ဒေသနွား၊ နို့စားနွား ၊ ဥစားကြက်၊ အသားတိုးကြက်၊ ဘဲ မွေးမြူ လုပ်ကိုင်ခြင်း အား ဒေသ ရေ မြေ ရာသီဥတုပေါ်မူတည်၍ တိုးချဲ့ဆောင်ရွက်ရန်၊ မွေးမြူရေးတိရစ္ဆာန်အစာ လိုအပ်ချက်အား ပြည်တွင်း စိုက်ပျိုးရေးထွက် ကုန်ကြမ်းများကို အများဆုံးအသုံးပြုရန် ၊ ငါးကန်များအပါအဝင် စိုက်ပျိုးမွေးမြူရေး လုပ်ငန်းများ၌ မြေယာအသုံးပြုခြင်းအား တည်ဆဲ လယ်ယာမြေဥပဒေ လုပ်ထုံးလုပ်နည်းများ နှင့်အညီ တိကျစွာ လိုက်နာဆောင်ရွက်ရန်၊ ရေချို ပုစွန်သားပေါက်လုပ်ငန်းကို မျိုးကောင်းများ ဒေသမျိုးများစမ်းသပ်ထားပြီး မျိုးသားပေါက်များ စတင်ဖြန့်ဖြူးလျက်ရှိရာ တိုင်းဒေသကြီး ပြည်နယ်အလိုက် ရေချိုပုစွန်မွေးမြူထုတ်လုပ်ရေး ဆောင်ရွက်ရန်၊ ရေငန်ပုစွန်မွေးမြူရေးလုပ်ငန်းအား တိုးချဲ့လုပ်ကိုင်လျက်ရှိသည့် မြိတ်/ ဘုတ်ပြင်း တို့၌ ယခုနှစ်ကုန်တွင် ပုစွန်သားပေါက် ထုတ်လုပ်ခြင်းနှင့် အစာထုတ်လုပ်ခြင်း တို့အား စတင်လုပ်ဆောင်နိုင်ရေး စီမံသွားရန်၊ လုပ်ငန်းရှင်များအနေဖြင့် နိုင်ငံတော်၏ လယ်ယာကဏ္ဍဆိုင်ရာမူဝါဒနှင့်အညီ လုပ်ငန်းများကို မှန်ကန်စွာဆောင်ရွက်နိုင်ရေး ကြပ်မတ် ဆောင်ရွက်ရေး ဆွေးနွေးမှာကြားသည်။ 

အလားတူ စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန ဒုတိယဝန်ကြီး ဒေါက်တာရဲတင့်ထွန်း နှင့် စီးပွားရေးနှင့်ကူးသန်းရောင်းဝယ် ရေးဝန်ကြီးဌာန ဒုတိယဝန်ကြီး ဦးမင်းမင်း တို့သည် မြန်မာနိုင်ငံသစ်သီးဝလံ၊ပန်းမန်နှင့်ဟင်းသီးဟင်းရွက်စိုက်ပျိုးထုတ်လုပ် တင်ပို့ ရောင်းချသူများအသင်း၊ မြန်မာနိုင်ငံ ဒူးရင်းစိုက်ပျိုးထုတ်လုပ်တင်ပို့ရောင်းချသူများအသင်း တို့မှတာဝန်ရှိသူများနှင့် စိုက်ပျိုးရေးအထူးပြုလုပ်ငန်းရှင်များအား တွေ့ဆုံ၍ သီးနှံများ စိုက်ပျိုးထုတ်လုပ်မှုနှင့် တင်ပို့ရောင်းချမှုဆိုင်ရာ ဆောင်ရွက်ဆဲလုပ်ငန်းများနှင့် ဆက်လက်ဆောင်ရွက်မည့်လုပ်ငန်းများ၊ လုပ်ငန်းလိုအပ် ချက်များကို ဆွေးနွေးခဲ့ကြကြောင်း သတင်းရရှိသည်။  

MOALI