ငါးဂျောင်းငါး၏ သဘာဝနှင့် အသုံးဝင်ပုံ

ငါးဂျောင်းငါးမျိုးဟာ နှုတ်ခမ်းမွှေးပါတဲ့ ကက်ဖစ်ရှ် catfish (ငါးခူ၊ ငါးကျည်း၊ ငါးတန်) ငါးအမျိုးနွယ်ဝင်ငါးတစ်မျိုးဖြစ်ပါတယ်။ မြန်မာနိုင်ငံနဲ့ ဘင်္ဂလားဒေ့ရှ့်နိုင်ငံတို့မှာ လူကြိုက်များတဲ့ ငါးတစ်မျိုးလည်း ဖြစ်ပါတယ်။ ငါးဂျောင်းငါးကို အင်္ဂလိပ်လို Sperata aor (Long whiskered-catfish)လို့ ခေါ်ပါတယ်။

ခန္ဓာဗေဒအချက်အလက်များ 

ငါးဂျောင်းဟာ ခန္ဓာကိုယ်ရှည်လျားပြီး ဦးခေါင်းပြားကာ ပါးစပ်မှာ ရှေ့ဖက်အဖျားကို အနည်းငယ်ထွက်နေပါတယ်။ မျက်လုံးမှာ ဦးခေါင်းအပေါ်ဘက်တွင် ဘဲဥပုံသဏ္ဍာန် ဘေးတိုက် ကန့်လန့်အနေအထား တည်ရှိပါတယ်။

နှာခေါင်းပေါက် ၂ စုံနဲ့ နှုတ်ခမ်းမွှေး ၄ စုံ ပါရှိပါတယ်။ အပေါ်နှုတ်ခမ်းမွှေး ၂ စုံဟာ အမြီးဘက်ရေယက်အခြေထိရောက်ရှိပါတယ်။ ကျော ဘက်နဲ့ ရင်ဘက်ရေယက်မှာ သန်မာတဲ့ ဆူးတောင်တွေ ပါရှိပါတယ်။ကျောဘက်ရေယက်ဟာ နောက်ပိုင်းအထိဖြာထွက်နေတဲ့ ရေယက်မျှင်များနဲ့ ဖွဲ့စည်းထားပါတယ်။ အဆီဖုရေယက်ဟာ အမြီးရေယက်အစအနီး နေရာမှာရှိပါတယ်။ အမြီးရေယက် နှစ်ခွမှာ အပေါ်ဘက်ရေယက်ဟာ အောက်ရေယက်ထက် အနည်းငယ် ပိုရှည်လျားပါတယ်။ ဘေးဘက်မျဥ်း ပြည့်စုံစွာ ပါရှိပါတယ်။

တွေ့ရှိသည့်ဒေသ

ငါးဂျောင်းငါးဟာ အိန္ဒိယ၊ ပါကစ္စတန်၊ နီပေါ၊ ဘင်္ဂလားဒေ့ရှ်နဲ့ မြန်မာ နိုင်ငံတို့မှာ တွေ့ရတဲ့ ငါးမျိုးစိတ် ဖြစ်ပါတယ်။

အရွယ်အစား 

အကြီးဆုံးအလျားမှာ ၆ ပေခန့်၊ အလေးချိန်မှာ ၅  ကီလိုခန့်ထိရှိပါတယ်။ ရေချိုနဲ့ ရေချိုရေငန်စပ်တို့မှာ နေထိုင်လေ့ရှိပြီး မြစ်၊ ချောင်း၊ ကန်၊ ဆည်တမံ၊ ရေလှောင်ကန်တို့ရဲ့  အောက်ခြေမှာလည်း နေထိုင်လေ့ရှိပါတယ်။  

မျိုးပွားခြင်း 

မုတ်သုန်ရာသီမကုန်မီ မျိုးပွားဖို့အတွက် အသိုက်ပြုလုပ်တတ်လေ့ရှိပြီး ဇူလိုင်၊ သြဂုတ်လတို့မှာ မျိုးပွားလေ့ရှိပါတယ်။ မြန်မာနဲ့ ဘင်္ဂလားဒေ့ရှ်တို့မှာ စျေးကွက်ဝင်တဲ့ အများကြိုက်နှစ်သက်တဲ့ ငါးမျိုးဖြစ်ပါတယ်။ စျေးကွက်ဝင်တဲ့ ငါးဂျောင်းငါးမျိုးများကို စမ်းသပ်သားဖောက်ခြင်းများ ဆောင်ရွက်နိုင်ရန် မျိုးပွားအင်္ဂါများ ဖွံ့ဖြိုးမှုကို ဦးစွာသုတေသနပြုလေ့လာရပါမယ်။ ထိုသို့လေ့လာနိုင်ရန် သဘာဝမှ အရွယ်ရောက်စပြုသော၊ အရွယ်ရောက်ပြီးတဲ့ မျိုးငါးတွေကို ရှာဖွေစုဆောင်း၍ အထီး၊ အမ အရွယ်အစားအလိုက် ခွဲခြားပြီး မျိုးပွားအင်္ဂါများဖွံဖြိုးမှုကို ဦးစွာပထမ သုတေသနပြုလေ့လာခြင်းကို စတင်ဆောင်ရွက်ရပါမယ်။

ငါးဂျောင်းငါး စားဖွယ်စုံ 

ငါးဂျောင်းငါးကို ဆီပြန်ဟင်း၊ ရေချိုချက်၊ အိုးကပ်ချက်၊ ငါးမွှေချက်၊ငါးပေါင်းထုတ်ထုတ်စားခြင်း  စသဖြင့် ပြုလုပ်စားကြပါတယ်။

ငါးဂျောင်းငါးနှင့် ကျန်းမာရေး 

ငါးဂျောင်းငါးဟာ အာဟာရဓာတ်ကောင်းစွာပါဝင်တဲ့ စားသောက်ဖွယ်ရာဖြစ်ပါတယ်။ သုတေသီတွေရဲ့ အဆိုအရ ငါးဂျောင်းငါးအပါအဝင် ငါးမျိုးစုံကို တစ်ပတ်မှာ ၂-၃ ရက်ခန့် စားသုံးသင့်တယ်လို့ဆိုပါတယ်။

ငါးဂျောင်းစားခြင်း၏ အကျိုးကျေးဇူးများ-

၁။ အာဟာရဓာတ်ကြွယ်ဝခြင်း

ငါးဂျောင်းအပါအဝင် ငါးအများစုမှာ ပရိုတိန်းဓာတ် ကောင်းကောင်းပါဝင်ပါတယ်။ အခြား ဗီတာမင်၊သတ္တု ဓာတ်တွေလည်း များစွာပါဝင်ပါတယ်။ အထူးသဖြင့် အဆီဓာတ်ကြွယ်ဝတဲ့ ငါးတွေမှာ အိုမီဂါ-၃ နဲ့ တခြား အာဟာရဓာတ်တွေ ပိုမိုကြွယ် ဝပါတယ်။ တခြားငါးအမျိုးမျိုးမှာလည်း ဗီတာမင် ဒီ နဲ့ ဘီတူး များစွာပါဝင်ပါတယ်။ သံဓာတ်၊ ဇင့်၊ အိုင်အိုဒင်း၊    မဂ္ဂနီဆီယမ်၊ ပိုတက်ဆီယမ် စတဲ့ သတ္တုဓာတ်တွေလည်း ကြွယ်ဝပါတယ်။

၂။ နှလုံးရောဂါဖြစ်နိုင်ခြေ လျော့နည်းခြင်း

ငါးဂျောင်းအပါအဝင် ငါးများမှာပါဝင်တဲ့ အဆီဓာတ်ဟာ နှလုံးကျန်းမာရေးကို ကောင်းစေပါတယ်။ ငါးဂျောင်းအပါအဝင် ငါးများကို ပုံမှန်စားသုံးနေသူတွေဟာ နှလုံးထိ ခိုက်ခြင်း၊ လေဖြတ်ခြင်းနဲ့ တခြား နှလုံးရောဂါမျိုးတွေ ဖြစ်နိုင်ခြေ နည်းပါတယ်။ နှလုံးရောဂါကြောင့် သေဆုံးနိုင်ခြေလည်း နည်းပါတယ်။

၃။ ကလေးများ ကိုယ်ခန္ဓာဖွံ့ဖြိုးရာမှာ အထောက်အကူပြုခြင်း

အိုမီဂါ-၃ အမျိုးအစားတစ်မျိုးဖြစ်တဲ့ DHA ဟာ ဦးနှောက်နဲ့ မျက်စိပိုင်းဆိုင်ရာ ဖွံ့ဖြိုးတိုးတက်ရေးအတွက် အထူးအရေးပါပါတယ်။ အထူးသဖြင့် ကိုယ်ဝန်ဆောင်ချိန်၊ ကလေးနို့တိုက်ချိန်တွေမှာ ပိုမိုလိုအပ်ပါတယ်။ ဒါ့အပြင် ငါးဂျောင်းအပါအဝင် ငါးကနေရရှိတဲ့ ပရိုတိန်းများဟာကိုယ်ခန္ဓာ အစိတ်အပိုင်းအားလုံး ဖွံ့ဖြိုးစေနိုင်ဖို့ အထောက်အကူပြုပါတယ်။

၄။ ဦးနှောက်ကို အကျိုးပြုခြင်း

အသက်အရွယ်ကြီးလာတာနဲ့အမျှ ဦးနှောက်ရဲ့ လုပ်ဆောင်နိုင်စွမ်းတွေ ကျဆင်းလာတတ်ပါတယ်။ အထူး သဖြင့် အယ်လ်ဇိုင်းမားလို ရောဂါမျိုးတွေဟာ ဦးနှောက်နဲ့ မှတ်ဉာဏ်ပိုင်းဆိုင်ရာကို ဒုက္ခပေးတတ်ပါတယ်။

သုတေသနတွေအရ ငါးဂျောင်းအပါအဝင် ငါးစားသုံးမှုများသူတွေမှာ ဦးနှောက်တစ်ရှူးများ ပျက်စီးခြင်းကို လျော့ကျစေနိုင်ပါတယ်။ ငါးဂျောင်းအပါအဝင် ငါးများများစားသုံးခြင်းအားဖြင့် ဦးနှောက်လုပ်ငန်း ဆောင်တာတွေ ကျဆင်းလာနိုင်ခြေကို ကာကွယ်ပေးပါတယ်။

၅။ စိတ်ဓာတ်ကျဆင်းမှုကို ကာကွယ်နိုင်ခြင်း

စိတ်ကျခြင်း၊ ဝမ်းနည်းခြင်း၊ အားအင်ကုန်ခမ်းခြင်း စတဲ့အခြေအနေ တွေဟာ သင့်နေ့စဉ်ဘဝကို ထိခိုက်စေပါတယ်။ စိတ်ဓာတ်ကျနေချိန်မှာ ငါးဂျောင်းအပါအဝင် ငါးများကို ပိုမိုစားသုံးသင့်တယ်လို့ သုတေသီအချို့က ဆိုပါတယ်။ အထူးသဖြင့် အဆီဓာတ်ကြွယ်ဝတဲ့ ငါးတွေမှာ အိုမီဂါ-၃ ကြွယ်ဝတာမို့ စိတ်ကျခြင်းပြဿနာကို သက်သာစေပါလိမ့်မယ်။ ငါးဂျောင်းအပါအဝင် ငါးများကိုစားခြင်းဟာ စိတ်ကြွစိတ်ကျ အခြေအနေမှာလည်း အထောက်အကူပြုပါတယ်။

၆။ ဗီတာမင် D ကြွယ်ဝခြင်း

ငါးဂျောင်းအပါအဝင် ငါးအမျိုးမျိုးဟာ ဗီတာမင် D ကြွယ်ဝတဲ့ အရင်း အမြစ်တွေပဲ ဖြစ်ပါတယ်။ အထူးသဖြင့် အဆီဓာတ်များတဲ့ ငါးတွေမှာ ပိုမိုပါဝင်ပါတယ်။ ချက်ပြုတ်ပြီးသား ဆယ်လ်မွန်ငါး ၄ အောင်စခန့်မှာ တစ်နေ့တာလိုအပ်တဲ့ ဗီတာမင် D ဟာ ရာနှုန်းပြည့်ပါဝင်တယ်လို့ သိရပါတယ်။ ငါးကြီးဆီမှာလည်း ဗီတာမင် D ပါဝင်ပါတယ်။

၇။ အမြင်အာရုံအားနည်းခြင်းကို ကာကွယ်ပေးနိုင်ခြင်း

အသက်အရွယ်ကြီးရင့်လာရင် မျက်စိထဲကကြွက်သားတွေ အား နည်းလာတတ်လို့ အမြင်အာရုံဝေဝါးခြင်း ဖြစ်တတ်ပါတယ်။ ငါးဂျောင်းအပါအဝင် ငါးစားခြင်းဟာ အဆိုပါ အခြေအနေကို သက်သာစေပါတယ်။ ငါးဂျောင်းအပါအဝင် ငါးအမျိုးမျိုးကို ပုံမှန်စားသုံးပေးနိုင်ရင် အသက်ကြီးချိန်မှာ ဖြစ်တတ်တဲ့ မျက်စိကြွက် သားများ အားနည်းခြင်းဖြစ်နိုင်ခြေကို လေးဆယ်ရာခိုင်နှုန်းထိ လျှော့ချပေးနိုင်တယ်လို့ ဆိုပါတယ်။

၈။ နှစ်ခြိုက်စွာအိပ်ပျော်ခြင်း

လူတိုင်းဟာ တစ်နေ့တာကာလမှာ နှစ်ခြိုက်စွာ အိပ်စက်တဲ့အချိန် လုံလောက်မှသာ စိတ်ပိုင်းရော၊ ရုပ်ပိုင်းပါ ကျန်းမာရေးကောင်းမွန်စေမှာ ဖြစ်ပါတယ်။ သုတေသနတစ်ခုမှာ ဖော်ပြထားချက်အရ ဆယ်လ်မွန်ငါးကို တစ်ပတ်မှာ သုံးရက်ခန့် စားသုံးသူတွေဟာ နှစ်ခြိုက်စွာအိပ်ပျော်နိုင်ကြောင်း သိရပါတယ်။ သုတေသီတွေရဲ့ ယူဆချက်အရ ငါးဂျောင်းအပါအဝင် ငါးတွေမှာ ဗီတာမင် D ကြွယ်ဝတာကြောင့် အဆိုပါအကျိုးကျေးဇူးကို ရရှိတယ်လို့ ဆိုပါတယ်။

အချုပ်အားဖြင့် ဆိုရသော်-

ငါးဂျောင်းငါးဟာ အရသာထူးခြားကောင်းမွန်လှပြီး မြန်မာနဲ့ ဘင်္ဂလားဒေ့ရှ်နိုင်ငံတို့မှာ လူကြိုက်များတဲ့ငါးတစ်မျိုး ဖြစ်ပါတယ်။ ဒါ့အပြင် ကျန်းမာရေးအကျိုးကျေးဇူးလည်း များပြားစွာ ရရှိနိုင်တာမို့ စားပေးသင့်တဲ့ ငါးတစ်မျိုးဖြစ်ပါကြောင်း လေ့လာရေးသားလိုက်ရပါတယ်။

ပင်လယ်ပြာ(ငါးဦးစီး)