စိုက်ပျိုးမွေးမြူရေးပညာနှင့် နိုင်ငံတကာ စိုက်ပျိုးမွေးမြူရေး တက္ကသိုလ်များ (အပိုင်း-၃၉)
မြန်မာနိုင်ငံစိုက်ပျိုးမွေးမြူရေးတက္ကသိုလ်ဘွဲ့ရကျောင်းသား/သူများ အပါအဝင် ယနေ့ခေတ်အလုပ်အကိုင် ရရှိမှု/ဆက်စပ်မှုအခန်းကဏ္ဏ
The Role of University Graduates and Current Employment Opportunities in Myanmar (ယခင်အပတ်မှအဆက်)
ထပ်မံပြီး စာရေးသူကြုံတွေ့ခဲ့ရသော စိုက်ပျိုးမွေးမြူတက္ကသိုလ်များ အပါအဝင် နိုင်ငံတကာ တက္ကသိုလ် ကျောင်းသား/သူဟောင်းများ၏ အခန်းကဏ္ဍကို ဆွေးနွေးပါမည်။တက္ကသိုလ်ဘွဲ့ရကျောင်းသားဟောင်းများ (University Alumni)သည် သက်ဆိုင် ရာတက္ကသိုလ်၏ ဂုဏ်သိက္ခာကို မြှင့်တင်ပေးသူများ၊ လက်ရှိကျောင်းသားများအတွက် စံနမူနာယူဖွယ်ရာများနှင့်ပညာရေး၊လူမှုရေးနှင့်စီးပွားရေးဆိုင်ရာ အကူအညီများ ပံ့ပိုးပေး နိုင်သူများအဖြစ် အရေးပါသော အခန်းကဏ္ဍမှ ပါဝင်နေပါသည်။
၁။ နိုင်ငံတကာတက္ကသိုလ်များ၏ ဘွဲ့ရကျောင်းသား/သူဟောင်းများ (Alumini) ၏ အခန်းကဏ္ဍ
ဘွဲ့ရကျောင်းသား/သူဟောင်းများသည် တက္ကသိုလ်နှင့်အဆက် မပြတ် ဆက်သွယ် လျက်ရှိပြီး အရေးပါဆုံး လှုပ်ရှားမှုများကို လုပ်ဆောင်ပေးနိုင်သူတွေ ဖြစ်ကြပါသည်။
(၁-က) စီးပွားရေး/ငွေကြေး ပံ့ပိုးမှု (Philanthropy & Endowment)။ နိုင်ငံတကာတွင် ဘွဲ့ရကျောင်းသား/သူဟောင်းများသည် တက္ကသိုလ်အတွက် အကြီးမား ဆုံးလှူဒါန်းသူတွေ ဖြစ်ကြပါသည်။ အမေရိကန်နိုင်ငံ ဟားဗတ် (Harvard)၊ စတန်ဖို့ (Stanford) စသည့် တက္ကသိုလ်တွေမှာသူတို့ လှူဒါန်းငွေကြောင့် အမြဲတမ်း အသုံးချနိုင်တဲ့ စုပေါင်းရန်ပုံငွေ(Endowment)များစွာရှိနေတတ်ပါသည်။ ဤငွေကြေးတွေက တက္ကသိုလ်ကျောင်းသား/သူ အထောက်အပံ့၊ သုတေသန၊ ထူးချွန် ဆရာ/မများခေါ်ယူ မှု၊ တက္ကသိုလ် အဆောက်အဦး အသစ်များ တည်ဆောက်မှုများကို အထောက်အပံ့ ပေးပါ သည်။
(၁-ခ) ပညာရေးနှင့် အသက်မွေးမှု။ အထောက်အပံ့ဘွဲ့ရကျောင်းသား/ သူဟောင်းတွေက ကျောင်းသားတွေကို သင်ကြားပေးခြင်း၊ အလုပ် အကိုင်အတွက် အကြံပေးခြင်း၊ လုပ်ငန်းခွင်အကြိုသင်တန်း (Internship) များကို ပံ့ပိုး ပေးခြင်း စသည်ဖြင့် အကူအညီပေးနိုင်ပါသည်။ တချို့ တွေက ဧည့်ဆရာ (Visiting Lecturer)၊ ဧည့်စာတမ်းကြီးကြပ်ဆရာ (Visiting Supervisor)၊ နည်းပညာ အကြံပေး (Technical Advisor) စသည်အဖြစ် ပါဝင်တတ်ကြပါသည်။ သူတို့၏ စီးပွားရေးနှင့် လက်တွေ့လုပ်ငန်းအတွေ့အကြုံတွေက တက္ကသိုလ်ရဲ့ သင်ကြားရေး၊ သုတေသနကို ပိုမို အကျိုးရှိအောင် ပြုလုပ်ပေးနိုင်ပါသည်။
(၁-ဂ) နိုင်ငံတကာ အဆက်အသွယ်နှင့် အစဉ်အလာကောင်းများပေါ်ထွက်စေမှု။ ဘွဲ့ရကျောင်းသား/သူဟောင်းတွေကယခင်ကသူတို့ဆက်သွယ်ခဲ့သော နိုင်ငံတကာ ပါမောက္ခ၊ ကြီးကြပ်ဆရာ/မများကို အသုံးချပြီး အမိတက္ကသိုလ်အတွက် နိုင်ငံတကာ သံတမန် တွေလို အလုပ်လုပ်ပေး နိုင်ပါသည်။ စီမံအုပ်ချုပ်မှု၊ စီးပွားရေး၊ သိပ္ပံနှင့် နည်း ပညာစသည့် အစဉ်အလာ ကောင်းနေရာများတွေမှာ သူတို့တွေရရှိထားတဲ့ အောင်မြင်မှု တွေက တက္ကသိုလ်အမည်ကို နိုင်ငံတကာအဆင့်၊ ကျော်ကြားမှုအဖြစ် မြင့်တင်ပေးနိုင် ပါသည်။
(၁-ဃ) စက်မှု၊ သိပ္ပံ၊ နည်းပညာလုပ်ငန်းများနှင့် သုတေသန။ အချိတ်အဆက်ဘွဲ့ရကျောင်းသား/သူဟောင်းတွေထဲကခေတ်နှင့်အညီ နည်းပညာလုပ်ငန်းခေါင်းဆောင်တွေ၊ နိုင်ငံတကာအဖွဲ့အစည်းတွေရဲ့ အကြီးအကဲတွေက တက္ကသိုလ်နှင့်ပူးပေါင်းမှုတွေ များပြားစွာ ဖန်တီးပေးပါသည်။ သုတေသန ပူးပေါင်းဆောင်ရွက်မှု၊ နည်းပညာ လွှဲပြောင်း ပေးမှု၊ စွမ်းဆောင်ရည်မြင့်ထုတ်ကုန်တွေ ဖန်တီးပေးနိုင်မှု စသည်တို့ များပြားစွာ အကျိုး ရှိစေပါသည်။
(၁-င) အစိုးရနဲ့ ခေတ်မီပညာရေးမူဝါဒကိုထောက်ခံပေးနိုင်မှု။ ဘွဲ့ရကျောင်းသား/သူဟောင်းတွေက တက္ကသိုလ် အုပ်ချုပ်ရေးအဖွဲ့ (University Council/Senate)၊ အကြံပေးအဖွဲ့ (Advisory Committee) တွေမှာ ပါဝင်ကူညီတတ်ကြ သလို၊ ခေတ်နှင့်အညီဆောင်ရွက်ရမည့် ပညာရေးမူဝါဒအတွက်အားပေးအကျိုးဆောင် ဖြစ်နိုင်ကြပါသည်။
၂။ ဘွဲ့ရကျောင်းသား/သူဟောင်းများ အရေးကြီးသည့်အကြောင်း
ငွေကြေးတည်တံ့ခိုင်မှု - သူတို့လှူဒါန်းငွေတွေကြောင့် တက္ကသိုလ်တွေ အစိုးရငွေ များစွာမလိုအပ်ဘဲ တည်တံ့နိုင်စေပါသည်။
နာမည်ကြီး၊ ဂုဏ်ကျက်သရေ တိုးတက်မှု - သူတို့၏စီးပွားရေး၊ လုပ်ငန်းခွင် အောင်မြင်မှုတွေက တက္ကသိုလ်ရဲ့ အရည်အသွေးကို ဖော်ပြပေးနိုင်ပါသည်။
နိုင်ငံတကာ ဆက်ဆံရေးအကျိုးရှိစေမှု - သူတို့တစ်တွေက နိုင်ငံရေး ခေါင်းဆောင်၊ နိုဘယ်ဆု (Nobel Prize) ရသူ၊ စီးပွားရေး ကော်ပိုရေးရှင်း၊ ဥက္ကဌ စသည်ဖြင့် အောင်မြင်နေသည့်အတွက်၊ နိုင်င့တကာနေရာတွေမှာ မိခင်တက္ကသိုလ် အတွက် သက်ရောက်မှုရှိနိုင်ပါသည်။
ကျောင်းသားဖွံ့ဖြိုးတိုးတက်မှု - တက္ကသိုလ်တွင် သူတို့ပါဝင်နေသည့် အတွက် ကြောင့် ဘွဲ့ရကျောင်းသား/သူ အသစ်တွေ အလွယ်တကူ အလုပ်အကိုင်နဲ့ အသက် မွေးမှုကဏ္ဍထဲ ဝင်နိုင်ပါသည်။
နိုင်ငံတကာအတွေ့အကြုံဖလှယ်မှု → နိုင်ငံရပ်ခြားမှာ နေထိုင်နေတဲ့ သူတို့တတွေ ကြောင့် တက္ကသိုလ်တွေ နိုင်ငံတကာ နည်းပညာဖလှယ်နိုင်မှု၊ ပူးပေါင်း ဆောင်ရွက် မှုတွေ တိုးတက်နိုင်ပါသည်။
ဥပမာများ
ဟားဗတ်တက္ကသိုလ် (Harvard University) Alumni လှူဒါန်းငွေကြောင့် ဒေါ်လာ ငါးဆယ်ဘီလီယံ ($50) ကျော်သော တက္ကသိုလ် ဖွံ့ဖြိုးရေးရန်ပုံငွေ (Endowment) များစွာရရှိခဲ့ပါသည်။
စတန်းဖို့တက္ကသိုလ် (Stanford University) Alumni တွေဖန်တီးထားတဲ့ Google, Yahoo, LinkedIn စသည့် ကုမ္ပဏီများကြောင့် ကမ္ဘာ့စွမ်းအားမြင့်/အင်အားကြီး နိုင်ငံကြီး အဖြစ် အမေရိကန်နိုင်ငံ ကအဆင့်တိုးတက်ခဲ့ပါသည်။
အောက့်စဖို့နှင့်ကိန်းဘရစ်တက္ကသိုလ်များ (Oxford & Cambridge Universities) Alumni တွေက နိုင်ငံတကာ သံတမန်ဆန်ဆန် တက္ကသိုလ် များ၏အမည်ကို ခိုင်မာ၊ ကျော်ကြားစေပါသည်။
မက်ဆာကျူးဆက်နည်းပညာတက္ကသိုလ် (MIT – Massachusetts Institute of Technology)Alumni တွေဖန်တီးထားတဲ့ စီးပွားရေးလုပ်ငန်းတွေက ကမ္ဘာ့ စီးပွားရေး ကို ဘီလျံချီထောက်ပံ့ပေးနေပါသည်။
ဘွဲ့ရကျောင်းသား/သူဟောင်းတွေဟာတက္ကသိုလ်ဖွင့်လှစ်ခဲ့သော သက်တမ်းတစ်လျှောက်လုံး ပယ်ပျောက်မသွားနိုင်သော၊ အမြဲတန်းဆက်သွယ်ရမည့် မိတ်ဖက်/ မိတ်ဆွေတွေ ဖြစ်ကြပါသည်။သူတို့မရှိဘဲ တက္ကသိုလ်တစ်ခုက ကမ္ဘာ့အဆင့်မီတက္ကသိုလ် (World-class University) အဖြစ် ရေရှည်တည်တံ့၊ ခိုင်မြဲဖို့ မလွယ်ကူလှပါ။
Alumni တွေဟာ –
Investors (ငွေကြေးပံ့ပိုးသူများ)
Mentors (ကျောင်းသားများကို လမ်းညွှန်ပေးသူများ)
Ambassadors (တက္ကသိုလ်အမည် ဂုဏ်ရှိ/အသရေ တိုးတက်စေသူများ)
Innovators & Collaborators (သုတေသန၊ စက်မှုနည်းပညာလုပ်ငန်းတွေနဲ့ ပူးပေါင်းသူများ) ဖြစ်ကြပါသည်၊
စာရေးသူ၏အတွေးတစ်စ
စာရေးသူမဟာသိပ္ပံပညာသင်ကြားခဲ့သော ဩစတေးလျနိုင်ငံ၊ ကွင်းစလန်တက္ကသိုလ်သည် ပညာရပ်စုံ/ဘာသာရပ်အစုံ သင်ကြား၊ သုတေ သနပြုနေသောကမ္ဘာ့နာမည်ကြီး တက္ကသိုလ် တစ်ကျောင်းဖြစ်ပါသည်။ ၁၉၀၉-ခုနှစ်ကတည်းက စတင်ဖွင့်လှစ်ခဲ့ပြီး နှစ်စဉ် ဘွဲ့ကြို၊ ဘွဲ့လွန် ကျောင်းသားဦးရေ ငါးသောင်းကျော်တက်ရောက် သင်ကြားသုတေသန ပြုလျက်ရှိနေပြီး စတင်ဖွင့်လှစ်ကတည်းက ၂၀၂၅-ခုနှစ်အထိ ဘွဲ့ရ ကျောင်းသား/သူ ၃၃၂,၀၀၀ ကျော် ရှိပြီး ဖြစ်နေပါသည်။ စာရေးသူဆီသို့ နှစ်စဉ် တက္ကသိုလ်မှ ဆက်သွယ်လျက်ရှိနေပြီး အလှူငွေ အနည်းဆုံး ဩစတေလျတစ်ဒေါ်လာမှ အစ ယနေ့အထိ အလှူခံ လျက်ရှိနေပါသည်။
၂၀၂၀ ခုနှစ် စာရေးသူ အမျိုးသားပညာရေးမူဝါဒကော်မရှင်တွင်တာဝန် ထမ်းဆောင် စဉ်က ကြုံတောင့်ကြုံခဲ ရန်ကုန်တက္ကသိုလ် နှစ် ၁၀၀ ပြည့်အခန်း အနားနှင့် တွေ့ကြုံခဲ့ရပါ သည်။ ရန်ကုန်တက္ကသိုလ်သည် တစ်ချိန်ကမြန်မာနိုင်ငံတွင်သာမက၊ အရှေ့တောင်အာရှ နိုင်ငံများကြား နာမည် ကြီးတက္ကသိုလ်ဖြစ်ခဲ့ပါသည်။ ထိုစဉ်က တာဝန်ရှိသူအချို့ကို ရန်ကုန် တက္ကသိုလ် ဘွဲ့ရကျောင်းသားများအသင်း (Yangon University Alumni) အကြောင်းကို မေးမြန်းကြည့်ရာ တက္ကသိုလ်တစ်ခုလုံး၏ဘွဲ့ရအသင်းနှင့် ဥက္ကဌစသည်တို့မရှိဘဲ သက်ဆိုင်ရာ ဘာသာရပ်အလိုက် မြန်မာစာ၊သင်္ချာ၊ဓာတုဗေဒ၊ပထဝီစသည် အသင်းများကိုသာ အံ့ဩစွာ တွေ့ရှိခဲ့ရပါသည်။ ဘာသာရပ်အလိုက် ရန်ပုံငွေများစွာရှိသော်လည်း နိုင်ငံတကာ နာမည် ကြီးတက္ကသိုလ်များကဲ့သို့ ပင်မရန်ကုန်တက္ကသိုလ်ကြီး၏ ဘွဲ့ရကျောင်းသားဟောင်းရန်ပုံငွေ ဝေးစွ တက္ကသိုလ်ကြီး၏အသင်းအနေနှင့်မရှိသေးပါ။ယနေ့ခေတ်တွင်တော့ ရှိပြီထင်ပါသည်။ ရန်ကုန်တက္ကသိုလ်မှမွေးထုတ်ပေးလိုက်သောမြန်မာ၊ကမ္ဘာ့နာမည်ကြီး ကျောင်းသား/ကျောင်း သူများစွာ မှတ်တမ်းတင်ရပါမည်။
တက္ကသိုလ်တစ်ကျောင်းချင်းအလိုက် ဖွံ့ဖြိုးတိုးတက်ရေးအတွက် ဘွဲ့ရကျောင်းသား / သူဟောင်းများအသင်းများမှလည်းတစ်ထောင့်တစ်နေရာမှ ပံ့ပိုးကူညီနိုင်ပါကြောင်းမီးမောင်း ထိုးပြပါရစေ။
ဒေါက်တာမျိုးကြွယ်
(ဆက်လက်ဖော်ပြပါမည်)