ရန်ကုန်‌ဈေးကွက်

ဆန်ဈေးကွက်

ယခုရက်သတ္တပတ်အတွင်း ဆန်စပါးကုန်စည်ဒိုင်(ဝါးတန်းလမ်း)တွင် ထုတ်ပြန်ထားသည့် ဆန်ဈေးနှုန်းများအရ ရွှေဘိုပေါ်ဆန်းဆန် အလတ်စ တစ်တင်းခွဲ တစ်အိတ်လျှင် ၂၀၀,၀၀၀ ကျပ်နှုန်းနှင့် အောက်စတစ်အိတ်လျှင် ၁၉၅,၀၀၀ ကျပ်နှုန်းဖြင့်လည်းကောင်း၊ ဖျာပုံပေါ်ဆန်း ဆန်ဟောင်း အလတ်စ တစ်တင်းခွဲ တစ်အိတ်လျှင် ၁၃၂၀၀၀ကျပ်နှုန်းနှင့် အောက်စတစ်အိတ်လျှင် ၁၂၇၀၀၀ ဖြင့်လည်းကောင်း၊ ဇီယာဆန်နှင့်ဧည့်မထဆန်ကြမ်း ၁၅ ရာခိုင်နှုန်းမှာ အလတ်စတစ်တင်းခွဲ တစ်အိတ်လျှင် ၆၆၀၀၀ ကျပ်နှုန်း နှင့်အောက်စတစ်အိတ်လျှင် ၆၄၀၀၀ ကျပ်နှုန်းဖြင့်လည်းကောင်း၊ ငစိန်ဆန်အလတ်စ တစ်တင်းခွဲ တစ်အိတ်လျှင် ၆၂၀၀၀ ကျပ်နှုန်းနှင့် အောက်စတစ်အိတ်လျှင် ၆၁၀၀၀ ကျပ်နှုန်းဖြင့်  ရောင်းဝယ်လျက်ရှိကြောင်းသိရသည်။ ယခင်အပတ် ဈေးနှုန်းများနှင့် နှိုင်းယှဉ်ပါက ရွှေဘိုပေါ်ဆန်း ဆန်နှင့် ဖျာပုံပေါ်ဆန်းဆန်များမှာ ဈေးနှုန်းပြောင်းလဲမှုမရှိသော်လည်း ဇီယာ၊ ဧည့်မထနှင့် ငစိန်ဆန် များမှာ တစ်အိတ်လျှင် ၁၀၀၀ ကျပ်မှ ၂၀၀၀ ကျပ်ခန့်အထိ ဈေးမြင့်လာခဲ့သည်။ ပြည်တွင်းစားသုံးမှု များသောဆန်ချောများမှာ ဆန်သစ်များ အဝင်ပါးလာချိန်ဖြစ်ခြင်းနှင့် အရည်အသွေးခြောက်သွေ့ ကောင်းမွန်လာခြင်း၊ ပြည်ပသို့ အနည်းငယ်တင်ပို့မှုရှိနေခြင်း၊ စားသုံးသူများက ပုံမှန်ဝယ်ယူမှုသာရှိခြင်း တို့ကြောင့် ယခင်အပတ်နည်းတူ ဈေးနှုန်းအမြင့်တွင်ပင် တည်ငြိမ်လျက်ရှိသည်။ ပြည်တွင်းသုံးစွဲမှု နည်းပြီး ပြည်ပတင်ပို့မှုရှိသော ဆန်ကြမ်းအုပ်စုများမှာ အိမ်နီးချင်းနိုင်ငံများ၏ ပြည်ပပို့ဆန်များ ဈေးမြင့်လာခြင်းနှင့် အရောင်းအဝယ်သွက်လာခြင်းတို့ကြောင့် သိသာစွာ ဈေးမြင့်လာခဲ့ခြင်းဖြစ်သည်။ ယခုနှစ်အတွင်း စူပါအယ်နီညိုဖြစ်ပေါ်ကာ ဆန်စပါးအထွက်နှုန်းများ လျော့ကျလာမည်ဟု ခန့်မှန်းချက် များ ထွက်ပေါ်လာခြင်းကြောင့်လည်းကောင်း၊ လောင်စာဆီ အကျပ်အတည်းများကြောင့်လည်းကောင်း    ကမ္ဘာ့နိုင်ငံအချို့၏ ပထဝီနိုင်ငံရေး အခြေအနေများနှင့် စစ်ပွဲများကြောင့်လည်းကောင်း ဆန်စပါး ဝယ်လိုအား ပြန်လည်ကောင်းမွန်လာခြင်းဖြစ်ပြီး ထိုင်းနှင့် ဗီယက်နမ်နိုင်ငံများတွင်လည်း ပြည်ပပို့ ဆန်များ ဆန်လက်ကျန်နည်းလာချိန်လည်းဖြစ်သည်။ ထို့ကြောင့် အိမ်နီးချင်းနိုင်ငံများ၏ ပြည်ပပို့ဆန် များအား ဈေးမြင့်စေခဲ့ပြီး ပြည်ပတင်ပို့ရန် ဝယ်လက်များကလည်း ဈေးမြှင့်ပေးကာ ဝယ်ယူမှုရှိခဲ့သည်။ သို့ဖြစ်၍ မြန်မာပြည်တွင်းသုံးစွဲမှုနည်းပြီး ပြည်ပတင်ပို့မှုရှိသော ဆန်ကြမ်းအုပ်စုများ ဈေးမြင့်လာခဲ့ခြင်း ဖြစ်သည်။    ရန်ကုန်ဈေးကွက်သို့ ဖျာပုံ၊ မော်ကျွန်း၊ ဘိုကလေး၊ကွမ်းခြံကုန်း၊ ဒေးဒရဲ၊ ကော့မှူး၊ တွံတေး၊ ဝါးခယ်မ၊ မြောင်းမြ၊  ကျိုက်လတ်၊ လပွတ္တာ၊ရွှေဘိုဒေသများမှ ဆန်ဝင်ရောက်မှု ပုံမှန်ရှိပြီး မဒါဂတ်စကာ၊ ဖိလစ်ပိုင်၊ တရုတ်၊ ပိုလန်၊ စပိန်၊ ချက်ရီပတ်ဘလစ်၊ နယ်သာလန်၊ ဖီဂျီ၊ ဘယ်လဂျီယမ်၊ ရိုမေးနီးယား စသောနိုင်ငံများသို့ ပင်လယ်ရေကြောင်းမှ ပုံမှန်တင်ပို့မှုရှိခဲ့ကြောင်း သိရသည်။

အစေ့ထုတ်ပြောင်းဈေးကွက်

အစေ့ထုတ်ပြောင်းများအား ထိုင်းနိုင်ငံသို့ သွင်းကုန် အခွန်ကင်းလွတ်ခွင့်ဖြင့် တင်ပို့နိုင်သော ကာလ ကုန်ဆုံးချိန်နီးကပ်လာခြင်းကြောင့်လည်းကောင်း၊ စိုက်ပျိုးထုတ်လုပ်မှု နည်းခဲ့ခြင်း ပြောင်းလက်ကျန်နည်းလာချိန်ဖြစ်ခြင်းကြောင့်လည်းကောင်း၊ ပြည်ပဈေးနှုန်းများ ဈေးမြင့်နေခြင်းကြောင့် လည်းကောင်း အစေ့ထုတ်ပြောင်းများအား ဝယ်လိုအားများကာ ဈေးမြင့်လျက်ရှိနေမြဲပင်ဖြစ်သည်။ ထို့ကြောင့် အစေ့ထုတ်ပြောင်းဈေးနှုန်းများမှာလည်း ယခင် ရက်သတ္တပတ်များနည်းတူ ဈေးအမြင့်တွင် တည်ငြိမ်လျက်ရှိသည်။ အစေ့ထုတ်ပြောင်း ၅၄ ပိဿာလျှင် ယခင် အပတ်နှင့်ယခုအပတ်ဈေးနှုန်းမှာ ၉၉၃၆၀ ကျပ်ဖြစ်ပြီး မေလဆန်းမှ ယခုအပတ်တိုင်အောင် ဈေး
ငြိမ်အရောင်းအဝယ်ဖြစ်ခဲ့ကြောင်း သိရသည်။

ပဲမျိုးစုံဈေးကွက်

အမေရိကန်နှင့် အီရန်နိုင်ငံတို့၏ စစ်ပွဲကာလ အပစ်ရပ်သက်တမ်းတိုးမှုရှိလာခြင်းနှင့်အတူ ကမ္ဘာ့ ရေနံဈေး၊ ရွှေဈေးနှင့် ဒေါ်လာငွေ ဈေးအနည်းငယ်ကျဆင်းလာခြင်းကြောင့်လည်းကောင်း ပဲမျိုးစုံ အဓိက ဝယ်လက်ဖြစ်သော အိန္ဒိယနိုင်ငံတွင် ဘရာဇီးနှင့် ထိုင်းနိုင်ငံတို့မှလည်း မတ်ပဲတင်သွင်းမှုရှိခြင်းကြောင့် လည်းကောင်း၊ မြန်မာ့မတ်ပဲ(သင်္ဘောတင်)များအား ဝယ်လိုအားနည်းကာ မတ်ပဲ(သင်္ဘောတင်)ဈေးနှုန်း များ ယခင်အပတ်ထက်ဈေးနိမ့်လာခဲ့သည်။ မတ်ပဲ(သင်္ဘောတင်)တစ်တန်လျှင် ယခင်အပတ်ပျမ်းမျှ ဈေး နှုန်းမှာ ၃၀၆၇၀၀၀ကျပ်ဖြစ်ပြီး ယခုအပတ်ဈေးနှုန်းမှာ ၃၀၆၀၀၀၀ ကျပ်သို့ ရောက်ရှိဈေးနိမ့်ခဲ့သည်။ ယခုရက်သတ္တပတ်အတွင်း ကုန်စည်ဒိုင်ဖွင့်ရက် ၆ ရက်ရှိခဲ့ပြီး ကုန်သေတ္တာ ၇၀ ခန့်အရောင်းအဝယ်ဖြစ် ခဲ့ကြောင်းသိရသည်။ ပဲစင်းငုံ(သင်္ဘောတင်)မှာမူ အိန္ဒိယ အစိုးရက တောင်သူထံမှဝယ်သော အနည်းဆုံး အာမခံဈေး(MsP)တိုးမြှင့်မှုတွင် ပဲစင်းငုံပါဝင်ကာ အိန္ဒိယပြည်တွင်း ပဲစင်းငုံဈေးမြင့်လာခြင်း၊ အိန္ဒိယနိုင်ငံ သည် မိုဇမ်ဘစ်၊ မာလာဝီ၊ ဆူဒန်၊ တန်ဇန်းနီးယားစသော နိုင်ငံများထံမှလည်း တင်သွင်းမှုရှိခြင်း၊ ပဲလို အပ်ချက်ရှိခြင်းတို့ကြောင့် ပဲစင်းငုံ(သင်္ဘောတင်)ဈေးနှုန်းမှာ ၃၁၃၂၀၀၀ ကျပ်ဖြစ်ပြီး ယခုအပတ်ဈေးနှုန်း မှာ ၃၁၄၀၀၀၀ ကျပ်သို့ ရောက်ရှိဈေးမြင့်ခဲ့သည်။ ယခုရက်သတ္တပတ်အတွင်း ကုန်စည်ဒိုင်ဖွင့်ရက် ၆ ရက် ရှိခဲ့ပြီး ကုန်သေတ္တာ ၅၀ လုံးခန့် အရောင်းအဝယ်ဖြစ်ခဲ့ကြောင်း သိရသည်။ ပဲတီရွှေဝါမှာ တရုတ်ဝယ်လို အားမျှော်လင့်ချက်နည်းလာခြင်းကြောင့် ပြည်တွင်းဈေးနှင့် ပြည်ပဈေးနှုန်းကျဆင်းနေဆဲကာလဖြစ်ခြင်း  ပြည်တွင်းသုံးစွဲမှုသာရှိခြင်းတို့ကြောင့် အရောင်းအဝယ်အေးကာ ဈေးငြိမ်လျက်ရှိသည်။ ပဲတီရွှေဝါ ၃ တင်း / ၆၀ ပိဿာလျှင် ယခင်အပတ်နှင့် ယခုအပတ်ပျမ်းမျှ ဈေးနှုန်းမှာ ၃၆၀၄၅၀ ကျပ်ဖြစ်သည်။ အလားတူပင် ထောပတ်ပဲ၊ ကုလားပဲ၊ ပဲလွမ်းဖြူ၊ ပဲပုပ်နှင့် ဘိုကိတ်ပဲများမှာ ပြည်တွင်း၊ ပြည်ပမှ အရောင်း အဝယ်အေးခြင်း၊ ပြည်တွင်းပုံမှန်ဝယ်ယူမှုသာရှိခြင်းတို့ကြောင့် ယခင်အပတ်ဈေးနှုန်းများဖြင့် သာ ဈေးငြိမ်အရောင်းအဝယ်အေးခဲ့သည်။ ထောပတ်ပဲ ၃ တင်း / ၆၀ ပိဿာလျှင် ပျမ်းမျှဈေးနှုန်းမှာ ၂၆၃၁၀၀ ကျပ်ဖြစ်ပြီး ကုလားပဲ တစ်ပိဿာလျှင် ပျမ်းမျှဈေးနှုန်းမှာ ၄၀၈၀ကျပ်ဖြစ်သည်။ ပဲလွမ်းဖြူ ၃ တင်း / ၆၀ ပိဿာလျှင် ပျမ်းမျှဈေးနှုန်းမှာ ၂၂၇၄၀၀ ကျပ်ဖြစ်သည်။ ပဲပုပ်ပဲ ၃ တင်း / ၆၀ ပိဿာလျှင် ပျမ်းမျှဈေးနှုန်းမှာ ၄၈၇၅၀၀ ကျပ်ဖြစ်သည်။ ဘိုကိတ်ပဲ ၃ တင်း / ၆၀ ပိဿာလျှင် ပျမ်းမျှ
ဈေးနှုန်းမှာ ၂၀၀၁၀၀ ကျပ်ဖြစ်သည်။

စားသုံးဆီဈေးကွက်

ကမ္ဘာ့စားအုန်းဆီအများဆုံးထုတ်လုပ်တင်ပို့သော နိုင်ငံများတွင် ဖြစ်ပေါ်လျက်ရှိသော ဈေးကွက်ဈေးနှုန်းများအပေါ်အခြေခံ၍ စားအုန်းဆီတင်သွင်း သိုလှောင်ဖြန့်ဖြူးခြင်း၊ လုပ်ငန်းကြီးကြပ်မှုကော်မတီ၏ ၂၀၂၆ ခုနှစ်၊ မေ ၂၂ ရက်မှ  ၂၈ ရက်အထိ ကုန်ဆုံးသော ကာလအတွက် ထုတ်ပြန်ထားသော ရန်ကုန် အထိုင်လက်ကားရည်ညွှန်းဈေးနှုန်းမှာ စားအုန်းဆီတစ်ပိဿာလျှင် ၇၄၂၃ ကျပ်ဖြစ်သည်။ ယခင် အပတ် ဈေးနှုန်းနှင့် နှိုင်းယှဉ်ပါက တစ်ပိဿာလျှင် ၇၆ ကျပ်နှုန်းဈေးနိမ့်လာခဲ့ခြင်းဖြစ်သည်။  ပြင်ပရှိ လက်လီဈေးကွက်တွင် သတ်မှတ်ထားသော ဆီဆိုင်အချို့၌ ရည်ညွှန်းဈေးနှုန်းထက် များစွာမကွာသော ဈေးနှုန်းများဖြင့် တစ်အိမ်ထောင်လျှင် စားအုန်းဆီ ၅၀ ကျပ်သားနှုန်းရောင်းချပေးလျက်ရှိသည်။ အချို့သော မြို့နယ်များတွင် စားအုန်းဆီ တစ်ပိဿာ၏ ပြင်ပဈေးနှုန်းမှာ ၁၄၀၀၀ ကျပ်ဝန်းကျင်ဖြစ်သည်။

အေးသန္တာဝင်း